'Blʋ ke nyiɔ ɔ' ‑seie ‑tɩ
25
Nyɔsoa wluɛ 'de Moisɩ ‑pee 'de sinai crʋ "kpei ɛ 'na:2 ‑Ɩn -tmʋʋ Israɛ -nyʋ ka ‑ɩn ‑na: ‑Bo ao pa 'e 'blʋa 'ɩn "nyɩ aopʋ 'di ɛ, aoa muɛ "itai 'a ɛ 'je fɔn, ɛ nɩɛ saba 'de Nyɔsoa 'a "i 'bɛɛa ‑tɩ' 'ʋn. 3 'De ‑sʋn ‑mɛɛo" 'di ɛ, ‑ma muɛ dɩ doa' 'de ‑ʋn o ‑kle, 'de ‑sʋn ‑mɛɛo" 'di ɛ ‑ma muɛ ‑ma fiinyɛ- 'kwa nmɔa' ‑wɛe ‑ɩn ‑je ɩa' 'jɔ ‑sa. 4 'Kaa ‑sʋn ‑mɛ" 'sɔn ‑nɛ ɛ nɩɛ ‑kwle ‑sʋn ‑o, 'blʋa 'a ‑kwle ‑sʋn ‑o, ɛ nɩɛ saba -nɩa Nyɔsoa 'a "i bɛɛ -sʋn. ‑Ɩn se dɩ do i 'de ‑ʋn o ‑kle, ‑ɩn se fiinyɛ- 'kwa nmɔ i. 5 ‑Ɩn se ɩa' 'jɔ ‑ɩ -wla ‑sʋn ‑sia -ɩ mɛa -wɛe ‑ɩ -croa ‑sai, ‑wɛe ‑ɩn se ‑ma fiinyɛ- -ɩn sea 'kwa nmɔ- ‑sai, ‑bo ɛ nɩ 'kan ‑wɛe ‑ɩn ‑je 'blʋa "itai ɛ 'je fɔn, ɛ nɩɛ 'blʋa 'a -kwle ‑sʋn o‑. 6 Aoa muɛ dɛ 'blʋa a mua croa' 'de ‑sɔn 'di 'mʋʋa‑ dia', ‑mɔ o, ‑ma dbonʋɩ o, ‑ma dbonʋ 'nynɔkpao o, nyʋ ‑ʋʋa nʋa ‑ma dbo 'de 'wɩ 'di ke dʋɩ ‑nɩa 'de ‑ma ‑gbu" ‑sɔn ke-, 7 'ka mɔ ɛ nɩ ‑ke 'de ‑ma "nɔdɩ o, nmi ‑nɩa 'e 'kwladi a ‑tɩ' 'ʋn: diiɛ "klein ‑wlʋa 'e 'blʋ 'ʋn mɩ ɩa mu dia'.
8 Aoa muɛ -kwle ‑sʋn ‑mɛ" 'sɔn ‑sroa', ɛmɛ ‑nɩ ‑sʋn ‑mɛ" 'sɔn 'a kpɛ ‑mɛ" 'sɔn ɛ nɩɛ ‑sʋn 'a kwla -nyiiɛ' 'jɔ ‑mɛ" nyɩɛ. 9 'Cʋ ‑mɛ" 'sɔn ‑nɛ 'ɛ 'wɩ ‑puue ‑nɛ 'di ɛ, ‑ɛ ‑nɩa dɛsaʋn 'a ‑kwɛ ‑wɩ klaa" a, aoa muɛ ‑kwein blaa' ao 'je 'mʋa nʋ 'de ka 'blʋa 'bɛa ɛ tɛan "kpei. 10 Aoa muɛ ɛɛ' ‑sʋn 'a kwla ‑mm" -nɩ kpɔi" ‑tea', ‑wɛe 'de 'blʋa ‑wee' "klein 'di ɛ ʋʋ 'je ka 'da nyʋ ‑wee' -teɛ ʋʋa' ‑cɛ" -pee. Ɛmɛ ‑nɩ ‑sʋn 'a kwla ‑mm" ‑nɛ ɛ ‑kɔ'. Nyʋ ‑wee' a muɔ ɔɔ' 'blʋ 'ʋn "dua 'de ‑kɔo de ‑wɛe nyʋ ‑wee' 'je ɔɔ' "bli ‑gbu" ‑sɔn demu. 11 Ka ‑sʋn a mua kwla ‑mm" nynia' jeejee 'ka ɩ 'je aoa' ‑kwle ‑sɔn 'a ‑kɔ' nɩ‑: Ao se dɛ jrɛ' do i, ɛɛ' ‑sʋn ‑tu 'di ɛ ao se dɩ ‑ɩ ‑tea tɔ' ‑ɩ ‑croa 'de aoa' ‑kle' "kpei 'cɛn i, ‑wɛe ao se fiinyɛ- ao sea 'kwa nmɔ ‑sai, 12 dɛ dɛ‑nʋɛ' ɛ nɩɛ ‑kwle ‑sɔn 'a ‑kɔ' ‑o, ɛɛ muɛ kpɔi" -tea' 'de Nyɔsoa 'a -tɩ' 'ʋn, aoa muɛ dɩ -mɛa 'de 'kwladii dia'.
13 Ɛɛ' ‑sʋn ‑tu di ɛ, nyɔ ɔ muɛ 'de ɔɔ' 'kwla "kpei de mua' due due'. 14 ‑Bo ao ‑tɩn' dɛ jrɛ' 'de aoa ‑ponyiɔ 'kwa a, 'dewlɛ ɔmɔ ‑tɩn' ɛ 'de ao 'kwa a, ao 'bo ba "jru i diiɛ. 15 Aoa muɛ 'kwla ao 'jea ‑tɩn 'dewlɛ ao 'jea ple ‑bo ao 'je ɛɛ' sɔɔn' po ɛ, aoa muɛ nɔ" ‑ɛ ‑wlʋa 'e debɔɔ ‑kɔ' ke -kle' 'a cɛan -sʋn -siae' ke nɔ" ‑siae' ‑wɛe nyʋ 'jea ‑kɔ' dee ‑tu" 'a -sʋn ‑tea'. 16 Ka ‑sʋn ‑sia 'e -tia, 'kamɔ -bo ɛ -tiei" ɛ, ɛɛ' sɔɔn' -tiei", 'dewlɛ -bo ɛ se "i -tie ɛ, ɛɛ sɔɔn' se "i -tie, dɛ dɛ‑nʋɛ' dɛ nyɔ ɔ plea ɛmɛ nɩ nɔ" ‑siae' ɔ 'jea' dbo 'di nʋʋ ɛ. 17 Ɛɛ' ‑tɩ' 'ʋn ɛ nyɔ jrɔ' 'bo ɔ "dɛi "jrui diiɛ, 'kaa ao toɛ ka aoa plea aoa' Kea a, dɛ dɛ‑nʋɛ' mɛ ‑nɩ 'mɔ ‑nɩ Nyɔsoa aoa' Kea.
18 Aoa muɛ 'ma 'srɩn ke 'ma kɛ' wɔn 'jea ‑wɛe ao 'jɩ "jriɛ o sie, kɩ "sia 'nynɩ aoa muɛ 'kan nʋa'. ‑Bo ɛ nɩ 'kan a aoa muɛ 'flɛ 'ʋn ‑tea' 'de 'blʋa 'di. 19 ‑Wɛe 'blʋa a muɛ nmɔa', aoa muɛ dɛ diia' aoa ‑kwlʋ 'a ka, ‑wɛe ao 'je kupeɛ' 'ʋn nɩ-.
20 Ao 'bɛɛ mɔɔ' ‑cɛ" ao 'je wlu ka: Dɛ ‑a ‑je di 'de ‑sʋn 'a ‑mɛ" 'sɔn ‑nɛ 'di ɛ‑, dɛ dɛ‑nʋɛ' mɛ ‑nɩ ‑a sea dɛ jrɛ' do i 'de ‑a sea dɛ jrɛ' cɛn ‑a seɛ i te i 'e? 21 Ao juuɛ nɛ ka 'de ‑sʋn 'a ‑mɛɛo" ‑nɛ 'di ɛ 'ma "diwan 'a muɛ aopʋ "kpei jia', aoa diiɛ 'e cro ɛ 'je ‑sʋn taan 'a diiɛ nʋ. 22 ‑Bo ao do dɩ 'de ‑sʋn 'a ‑mɛ" na ‑nɛ 'di ɛ, aoa muɛ diiɛ soa diia' ke mɔɔ' ‑cɛ" mamaʋ 'sʋ ‑sʋn 'a ‑mɛ" nyɛ ‑nɛ 'jeɛ jɛɛ‑.
23 'Blʋ se pleeɛ i mamaʋ 'sʋ ɛ se 'e siei dɛ‑nʋɛ' mɛ ‑nɩ 'mɔ ‑ble 'blʋa ‑wɛe ao nɩ dʋɩ ke nyʋ ‑nɩa bʋ ja ‑o 'de 'ʋn "bli. 24 Ɛmɛ -tɩ 'blʋa "klein ‑ɛɛ mua aoa' dɛ nɩa' a, aoa muɛ 'blʋ ‑seie dɛ wlu "kpei 'bɛɛa.
25 ‑Bo ‑ma dedi' se dɛ 'jeea 'bɛɛ‑ ‑wɛe ɔ 'je ɔɔ' 'kwla 'a 'fɔ jrɛ' ple ɛ, ɔɔ' dedi' ‑ɔ ke ɛ ‑kooa "i 'bɛɛ ɔ 'jeɛ ‑seie. 26 ‑Bo nyɔ jrɔ' se 'e nɩ 'de ɔ jeɛ ‑seie, 'de ɔmɔ ɔ' ‑cɛ" 'je dɛ 'je ‑ɛ ‑jeɛ ‑seie ɛ, 27 ɔɔ muɛ ‑sʋn ‑sroa' ‑tea 'de dɛ ‑wlʋa ɛɛ' ple nɔ" ‑wɛe -ɛ -jea -sʋn 'a kwla mm" 'a -kwle -kɔ -wɛe ɔ 'je nyɔ ‑ɔɔ 'kwa ɔ ‑tɩɩɛn ʋn 'a nɔ" ‑siae' ‑kei" ‑sa, ‑bo ɛ nɩ 'kan ‑mɛ ɔɔ' dɛ 'bɛɛ ɛ 'jeɔ 'kwa de ji. 28 'Kaa ‑bo ɔ se dɛ jrɛ' 'je mamaʋ ɔ se ɔɔ' 'blʋ ‑seie ɛ, ɛɛ muɛ nyɔ ‑tɩn' ɛ 'kwa sia' mamaʋ 'sʋ ‑sʋn ‑ɛɛ 'di nyʋ ‑tu" 'a ‑sʋn 'kwla ‑mm" 'a ‑kwle ‑kɔ 'e nynɩ. Ɛɛ' nɔ" tu 'di ɛ nyʋ 'jeɔ "nyɩ ‑o ‑wɛe ɔ 'je ɔɔ' dɛ "kpei jii-.
29 ‑Bo nyɔ jrɔ' ple 'dipɛɛn ‑gbu" ‑ɛ ‑nɩa 'e ‑kwlɔ nyʋ bla ‑gblo" 'dei 'di ɛ, ‑mɛ dɛ -tba' 'e 'wɩ ‑ɛɛ 'di ɛ plea ɔ 'bleɛ ‑sʋn due' ‑wɛe ɔ 'jeɛ ‑seie, 'mʋʋa‑ 'de ɛ 'e "tii-. 30 ‑Bo ‑sʋn due' "sii "i ‑wɛe ɔ se ‑gbu" ‑nɩa 'mʋʋa‑ ‑seie, ɛɛ muɛ ɛɛ' ‑tɩn i ke ɔɔ' "nynuu 'kwa sia' 'bode: ‑Bo ‑sʋn 'a kwla ‑mm" 'a ‑kwlea' ‑kɔ nyni ɛ nyʋ seɛ 'bɛɛ nyʋ 'je ɛɛ' jei "nyɩ. 31 'Kaa, ‑gbu" ‑jɩ ‑nɩa 'de ‑kwlɔ nyʋ sea ‑gblo 'dei bla 'di ɛ nyʋ a mua ‑mɩ ja ‑gbʋn 'a ka ‑kle' ‑nɩa 'e 'kwla "kpei nɩa, nyʋ 'bɛɛ ɔ jɩ ‑seie 'dewlɛ nyɔ 'je ɩa jei "nyɩ 'de ‑sʋn kwla ‑mm" 'a ‑kwlea' ‑kɔ' nɔ".
32 'De ‑bo ɛ nɩ lefi 'a "nynuu ‑gbu" ʋʋpʋ‑ 'blea' 'de ʋʋa' -kwlɔ 'dii ɛ, ʋʋpʋ 'bɛɛ ʋʋ 'jɩ ‑seie 'de nɔ" "oo nɔ" ‑wee' "klein 'di. 33 ‑Bo lefi 'a "ju ple ɔɔ ‑gbu" 'de lefi i jrɔ' 'kwa a 'de lefi 'a -kwlɔ jrɛ' 'di ɛ, nyʋ ‑tɩɛn' ɛ ʋʋa muɛ 'di 'wlʋa 'de ‑sʋn 'a kwla ‑mm" 'a ‑kwlea' ‑kɔ' 'wɩ o, dɛ dɛ‑nʋɛ' ‑gbu" ‑nɩa 'de lefi 'a "nynuu 'a ‑kwlɔ 'dii 'a 'sʋ 'a 'sʋ -nɩ ʋʋpʋ 'a 'kɛn nyʋ seɛ 'bɛɛ nyʋ 'je ʋʋpʋ 'kwa ‑sa 'de Israɛ -nyʋ "klu. 34 ‑Kle' ‑nɩa 'de ʋʋpʋ 'a ‑kwlɔ wɔn i seɛ 'bɛɛ ɩ 'je pleeɛ‑, dɛ dɛ‑nʋɛ' ɩ nɩɛ ʋʋa' 'kɛn ‑o 'de nɔ" "oo nɔ" ‑wee' 'di.
35 ‑Bo ‑ma dedi' ‑ke ‑ɩn ‑tea i se dɛ 'jea 'bɛɛ ‑wɛe ɔ 'je wɛenyɔ 'kpa a, ‑mɛ ‑ɩn ‑je ɔ kwa wɛi ‑te', ‑bo ɔɔ' ‑cɛ" mɔ nɩ 'dʋɩ 'dewlɛ nyʋ ‑nɩa bʋ ja, ‑bo ɛ nɩ 'kan ɛ ‑wɛe ɔ 'je ‑ʋn dɛ ‑pʋn" 'jee‑. 36 ‑Ɩn ‑plee ‑ma Kea ɔ 'bo dɛ "kpei -teɛ ɔ 'bo -ʋn "nyɩɛ, ‑bo ɛ nɩ 'kan ‑mɛ ‑ma dedi' 'bɛɛ' ɔ 'je 'kmʋ nɩ 'de ‑ʋn ‑pʋn". 37 ‑Bo ‑ɩn poɔ 'wɛi 'kpan a ɔ bɔɛ "kpei ‑teɛ ‑wɛe ‑bo ‑ɩn ‑nyɩ" ɔ diiɛ ‑ɩn ‑bo -crɔn' jrɛ' ‑kwlɩ" ‑teɛ 'de ɛ 'de. 38 'Mɔ ‑nɩ Nyɔsoa, aoa' Kea, -ɔ ‑sa aopʋ Esipʋ ‑wɛe ‑ɛ ‑nyɩ" aopʋ kanaa blʋa‑, 'de 'ɩn 'je aoa' Kea nɩ.
39 ‑Bo ‑ma dedi' ‑ɔ ‑ke ‑ɩn ‑teai' se dɛ 'jeea 'bɛɛ ‑wɛe ɔ 'je ɔɔ ‑cɛ" ple 'de ‑ʋn 'kwa ɛ ɔ 'bo ‑ʋn "juɛi nʋʋɛ ka kʋɔn nɩa. 40 ‑Ma muɔ kpʋn 'a ka nyɔ ‑ɔɔ nʋa dbo nyʋ a ‑saa' ‑kei" 'dewlɛ ka nyʋ ‑nɩa nabʋ ja nɩa ɔɔ mua ‑ma dbonʋɩ nɩa' mamaʋ 'sʋ ‑sʋn a kwla ‑mm" 'a ‑kwlea' ‑kɔ' 'a 'wɩ 'e nyni. 41 'Sʋɛ ɔɔ muɛ ‑ma dbo "i 'wlʋa, ɔ mɔ o ɔɔ' "nynuu o, ‑wɛe ʋʋ 'je ʋʋ "bli ‑gbu ‑sɔn mu 'de ʋʋ 'je ʋʋa' "bɛma 'a ‑wi" 'a 'kwla "kpei jii-. 42 Dɛ dɛ‑nʋɛ' nyʋ 'ɩn ‑sa 'de Esipʋ ʋʋ nɩɛ 'ma "juɛi nʋʋ‑ ‑o, nyʋ seɛ 'bɛɛ nyʋ 'je ʋʋpʋ ple ka kʋɔn nɩa. 43 ‑Jɛ ‑ma pleea ‑ma Kea a, ‑mɛ ‑ɩn se ʋʋpʋ bʋ ‑sɔn i sʋʋan i.
44 -Bo ao nɩɛ "i ao 'je Kʋɔn, "nynunmai 'dewlɛ 'nynɔkpae 'ble ɛ -mɛ 'blʋa ‑pian aopʋ 'dewei 'di 'bo ao 'je ʋʋpʋ -tɩɩn. 45 'De ɛ ‑mɛ 'de ɛ, ao 'bɛɛ 'de dʋɩ ‑tia" aopʋ "klu 'a "nynʋʋ- ke 'dʋɩ- -wlʋa 'de ʋʋa' 'blʋa 'di ‑tɩn ka kʋɔn nɩa ‑wɛe ʋʋ 'je aoa' dɛ 'kpa. 46 Ao 'bɛɛ ao 'je ʋʋpʋ aoa' "nynuu "nyɩ ‑wɛe ʋʋ 'je ʋʋpʋ 'a 'kɛn 'kpa. Ʋʋa muɛ aoa' kʋɔn nɩa' 'de nɔ" "oo nɔ" ‑wee' 'di, 'kaa ao se Israɛ -nyʋ ‑nɩa aoa' "bo 'a "nynuu bʋ ‑sɔn i sʋʋan i.
47 ‑Bo dʋɩ ‑tia" aopʋ "klu 'dewlɛ -ɔ -nɩa bʋ ja 'wlʋ dɛ 'ʋn, ‑wɛe ‑ma "bo 'a "ju 'je ɔɔ' kpan 'ble ‑wɛe ɔ 'je ɔɔ ‑cɛ" ple 'de ɔ 'kwa 'dewlɛ 'de dʋɩ 'a "ju jrɔ' 'kwa a, 48 ‑Bo ɔɔ -cɛ" plea' mɔ ‑kwɛ mɔ 'de ɛ, ɔ 'bɛɛ nyʋ 'jeɔ ‑seie: Ɔɔ' dedi jrɔ' 'bɛɛ ɔ 'je ɔ ‑seie. 49 -Bo ɔ se dedi' 'ble ɛ -mɛ ɔɔ' "bo 'a "dei 'dewlɛ ɔɔ' "bo 'a "dei 'a "ju, ɔɔ' ‑gbu" ‑sɔn nyʋ 'bɛɛ ɔ 'je ɔ ‑seie, 'de ‑bo ɔɔ' ‑cɛ" 'je dɛ ʋʋ ‑tɩɩɔn 'ʋn ɔ 'bɛɛ ɔ 'je ɔɔ' ‑cɛ" 'kpa ‑seie. 50 -Bo ɔ 'bɛɛ ɔ 'je ɔɔ' -cɛ" -seie ɛ, ɔ 'bɛɛ ɔ ke nyʋ ‑tɩn ɔ 'je wlu 'ʋn 'bɛɛ‑ ‑wɛe ʋʋ 'je nɔ" tba ɔɔ ‑tɩn nɔ" ‑wɛe ‑ɛ ‑nɩa 'e ‑sʋn 'a kwla ‑mm" 'a ‑kɔ' 'nynɩ ‑sro'. ‑Wɛe ɛɛ' sɔɔn' ke -sʋn -siae' 'je koɔ-, 'de ɛɛ sɔɔn' 'je poɛ ka nyɔ 'ɔ 'wɩ due' dbo 'a sɔɔn' nɩa. 51 ‑Bo ‑sʋn ‑tuu" ‑tuu sie' -wɛe -sʋn 'a kwla mm" -kɔ 'je nyniɛ, dɛ ɔ 'je 'a to ‑wɛe ‑ɛ ‑je ɔ ‑seie ɛ ke dɛ ʋʋ ‑tɩn ɔ 'ʋn 'je 'bɛɛ‑ ‑o. 52 'De ‑bo nɔ" dɛ ‑saan" sie ‑sʋn 'a kwla ‑mm" 'a ‑kwle' ‑kɔ' "juɛi ɛ, ɛmɛ ɔɔ mu ja ‑gbʋn 'a ‑wɛe sɔɔn' ‑ke ‑sʋn ‑siae' -kooa "i ɛ, ɔ 'jeɛ to 'de ɔɔ' ‑seia' ‑tɩ' 'ʋn. 53 Ɔɔ muɛ nyʋ ‑ɔɔ o ‑gbu" ‑sɔn ɔɔ nʋa dbo sia' nɔ" "o nɔ" -wee' ɔɔ mua nʋa' ka ‑sʋn 'di dbonʋɩ nɩa 'kamɔ ɔ 'je nɩ-, 'kaa ‑ɩn se ɔ "i "tai ʋʋ se ɔ bʋ -sɔn i crii. 54 ‑Bo nyɔ se ɔ ‑seie 'de ka ‑nɩa 'mʋʋa‑ 'a jrɔ' ɛ, ɔɔ muɛ ɔ ke ɔɔ' "nynuu 'a 'flɛ 'ʋn ‑tea' 'jea 'de ‑sʋn 'a kwla ‑mm" 'a ‑kwle' ‑kɔ 'ɔ nɔ". 55 'De dɛ‑nʋɛ', Israɛ nɩɛ 'ma "juɛi nʋʋ- ‑o, ɛmɛ ‑tɩ 'ɩn ‑seie ʋʋpʋ 'de Esipʋ. 'Mɔ ‑nɩ Nyɔsoa aoa' Kea.